Die Arend

DIE AREND (Deel 1).

Deuteronomium 32:11-12 sê vir ons: "Soos 'n arend wat sy kleintjies uit die nes uitskop, oor hulle fladder en hulle vang op sy vlerke wat hy oopsprei, soos 'n arend wat sy kuikens op sy vlerke dra, so het die Here, net Hy alleen, Sy volk gelei; daar was nie 'n ander god by Hom nie."

Die arend is 'n voël wat sy nes bou hoog in die rotse en kranse van berge en weg van mense af. Hierdie voël sal nie bly waar daar baie mense is nie. Die arend se nes word nie gebou in bome soos baie ander voëls nie en die nes het ook nie dieselfde vorm nie. Die arend se nes bestaan uit 'n laag takke of stokke wat plat op die rotse lê en bedek met hooi of strooi, vere en pels van voëls en diere wat gevang is. Die HAT beskryf die arend soos volg: Roofvoel van die familie Falconidae, met kort, breë stert, sterk krom snawel en lang vlerke.

 Kenmerkende eienskappe van die arend kan gelees word in die Bybel en slegs 'n klein aantal hiervan sal nou gelys word:
 - Hierdie voëls vlieg baie vinnig soos gesien kan word in Deuteronomium 28:49 en Job 9:26.
- Die arend kan tot sewentig jaar oud word en verveer elke lente om dan soos 'n jong voël te lyk – Psalm 103:5.
- Die oog van die arend is baie skerp. Die oog het 'n binneste ooglid wat baie dun is en oor die oog getrek kan word soos 'n gordyn indien daar te veel skerp lig is. Met hierdie metode van die oog beskerm kan die arend in die son kyk. Hierdie voël kan baie verder as die mens sien. Wanneer die arend hoog in die lug vlieg dat dit lyk soos 'n spikkel, word klein diertjies op die grond opgemerk en vlieg die arend met 'n duikslag af om hierdie klein diertjies te vang met sy kragtige kloue – Job 39:29-32.
Deuteronomium 3211-12 beskryf pragtig God se sorg oor Sy kinders van Israel wat Hy uit die wildernis gelei het en dit is vandag nog net so van toepassing soos in Moses se tyd en beskryf dit ook God se goedheid en guns vir Sy kinders.

Dit is 'n seën en maak 'n mens gelukkig om te weet dat die Arend oor Sy kleintjies wag hou en hulle versorg en hulle nuwe krag gee dag vir dag – Jesaja 40:31.

GEBED: Dankie, Here, dat U die Kragbron is wat my lewe elke dag herlaai want, daarsonder sal ek nie klaarkom nie. Amen.

DIE AREND (Deel 2).

Hiermee sal gepoog word om aan te dui wat die Bybel ons alles leer rondom die arend. Die lys is geensins volledig nie en kan derhalwe aangevul word.

- Die arend is 'n voël wat prooi vang – Job 9:26 en Matteus 24:28.
- Miga 1:16 noem dat die arend as aasvoël 'n kaalkop het.
- Dit word beskou as onrein, verbode of 'n gruwel – Levitikus 11:13 en Deuterenomium 14:12.
- Daar is verskillende soorte arende – Levitikus 11:13 en 11:18.
- Word ook genoem die arende van die hemele – Klaagliedere 4:19.
- Word beskryf as 'n voël met baie skerp sig – Job 39:32.
- Word beskryf as baie vinnig – 2 Samuel 1:23.
- Dit vlieg hoog die lug in – Spreuke 23:5.
- Daniël 4:33 verwys na die sterkte van die arend se vere.
- Esegiël 17:3 en 17:7 verwys na die groot vlerke van die arend.
- Spreuke 30:19 noem dat dit onbegryplik is hoe 'n arend in die lug bly.
- Esegiël 17:3-4 vertel hoe die arend hom verlustig aan die seders.
- Job 39:30-31 vertel dat die arend hoog in die kranse sy nes het.
- Die arend voer die kuikens met bloed – Job 39:33.
- Wysheid en diens van God se predikers – Esegiël 1:10 en Openbaring 4:7.
- Beskryf groot en sterk konings – Esegiël 17: en Hosea 8:1.
- Skenk jeugdige krag – Psalm 103:5.
- God gee nuwe krag en mense word nie moeg nie – Jesaja 40:31.
- Om ons te leer van God se sorg oor Sy kerk – Eksodus 19:4 en Deuterenomium 32:11.
- Vlerke van beskerming oor die kerk – Openbaring 12:14.
- Spreuke 23:5 meld dat rykdom kortstondig is.
- Vyandige nasies en weermagte wat vinnig beweeg – Deuterenomium 28:49, Jeremia 4:13, Jeremia 48:40 en Klaagliedere 4:19.
- Die valse sekuriteit van die goddelose mense – Jeremia 49:16 en Obadja 1:4.
- Job 9:26 beskryf hoe die mens se dae vinnig verby skiet.
- Beskryf die standaard van die Romeinse weermag in Jesus se dae – Matteus 24:15 en 24:28.

GEBED: Dankie, Here, dat U U ontferm oor U kerk wat Jesus hier op aarde kom stig het. Dankie vir U liefde wat ek sonder verdienste ontvang. Amen.

DIE AREND (Deel 3).

(Colin Lamont)

 Job 39:31 vertel ons: "Hy woon op die rotse, hy bly daar, op die spits en die kranse.

Alhoewel baie van ons al foto's gesien het van 'n groot nes van die arend hoog op rotse of in kranse en af en toe ook hoog in die takke van groot bome, het slegs enkeles van ons die binnekant van die nes al besigtig.

 Wanneer die moeder arend haar nes bou begin sy deur gebruik te maak van dorings, stukke takke, skerp klippe en 'n aantal ander items wat glad nie geskik lyk vir die projek nie. Die moeder-arend lê dan die nes uit met wol, vere en pels van diere wat sy gevang het en dit maak die nes sag en gemaklik vir die eiers wat gelê word.

Teen die tyd dat die groeiende kuikens vliegstadium bereik, wil hulle nie die nes verlaat nie omrede hulle gemaklik is met die omgewing en ook die vry maaltye wat die moeder-arend besorg. Dit gebeur dan dat die moeder-arend die nes met haar sterk kloue en snawel begin opbreek. Die pels en vere word opgelig om die skerp klippe en takke te ontbloot. Dit veroorsaak dat die jong arende baie ongemak in die nes moet verduur. Uiteindelik sal die jong arende nie meer die ongerief verduur nie en ook ander invloede veroorsaak dat hulle die nes verlaat om aan te beweeg na meer volwasse stadia. (Today in the Word, June 11, 1989)

 

Ons Here God maak ons geskik deur die Heilige Gees omdat ons bereid is om vir Hom te werk. Wanneer ons gereed is word ons uit ons nes gedring om Sy Woord aan ander te verkondig net soos die moeder-arend haar jongelinge dring om die nes te verlaat. Die tydperk van opleiding wat die Heilige Gees bied verskil van mens tot mens. Een persoon gaan baie gouer volwasse raak in die Heilige Gees as die volgende persoon. Ons besef ook dat die opleiding en bekwaamheid wat die Heilige Gees bied eers eindig wanneer Jesus ons kom haal om by Hom in die hemel te wees. Ons hemelse Vader wil nie godsdiens hê nie. Hy verlang 'n persoonlike en intieme verhouding met elk van Sy kinders. Johannes 3:30 sê dat Hy meer moet word en ons minder. Dit is lekker om die Here te dien. Soos in elke werk is dit nie altyd maanskyn en rose nie, maar ons weet waarnatoe ons werk met God aan ons kant.

 

GEBED: Dankie, Here, dat U as die Groot Arend ons as die klein arende onder U vlerk beskerm en geskik maak om U werk op aarde te verrig. Sonder U kan ons dit nie doen nie. Amen.